सुनसरीमा मंगलबार साँझ भएको एक मोटरसाइकल दुर्घटनामा परेर भोजपुरका एक जना स्थानीय नेताको निधन भएको छ।
सुनसरीको तरहरा बजारतर्फ आउँदै गरेको को ३८ प २००९ नम्बरको मोटरसाइकल इटहरी २० तरहरामा दुर्घटनाग्रस्त हुँदा भोजपुरका स्थानीय नेता विजय राई (मुकेश) को निधन भएको हो।
भोजपुरको हतुवागढी गाउँपालिका वडा नं. ५ घर भएका ३१ वर्षीय विजय राई (मुकेश) नेकपा एमाले भोजपुर हतुवागढी वडा नं. ५ का अध्यक्ष हुन् । उनी सवार मोटरसाइकल हिमशिखर बोर्डिङ स्कुल नजिकै भित्री सडकखण्डमा आँफै अनियन्त्रित भएर सडकको दाँहिने तर्फको बिजुलीको पोलमा ठोक्किएर दुर्घटना भएको इलाका प्रहरी कार्यालय इटहरीका डीएसपी लक्ष्मी भण्डारीले जानकारी दिए ।
घटनामा गम्भीर घाइते राईलाई तत्काल बीपी कोइराला स्वास्थ्य विज्ञान प्रतिष्ठान धरान पठाइएकोमा चिकित्सकहरुले मंगलबार राति ८ः१० बजे मृत घोषित गरेको डीएसपी भण्डारीले जानकारी दिए ।
सोहि दुर्घटनामा परेर इटहरी २० बस्ने १९ वर्षीय अनिष बस्नेत घाइते भएका छन् । बस्नेतले आफू मोटरसाइकलमा पछाडि सवार रहेको बताउँदै आएका छन् । उनलाई प्रहरीले नियन्त्रणमा लिएर अनुसन्धान सुरू गरेको छ।
तत्काल मोटरसाइकल चालक को हो भन्ने पहिचान नभएकाले यसबारे थप अनुसन्धान भइरहेको प्रहरीको भनाइ छ । मोटरसाइकल तरहरा प्रहरी चौकीको नियन्त्रणमा रहेको छ भने घटनाबारे थप अनुसन्धान भइरहेको प्रहरीले जनाएको छ ।तीव्र गतिका कारण मोटरसाइकल अनियन्त्रित भएर दुर्घटना भएको हुनसक्ने प्रहरीले जनाएको छ ।
