काठमाडौँ। हाइटेरा तथा नेपालका लागि त्यसको आधिकारिक विक्रेता ‘अडिडेल’ले नेपालका तीनवटै सुरक्षा निकायहरूलाई सञ्चार सामग्री सहयोग स्वरूप हस्तान्तरण गरेका छन्।
सशस्त्र प्रहरी बल नेपाल (APF), नेपाल प्रहरी र नेपाली सेनालाई विपद् व्यवस्थापन, खोज तथा उद्धार कार्यलाई प्रभावकारी बनाउनुका साथै आपत्कालीन अवस्थामा सुरक्षा निकायहरूबीचको समन्वयलाई थप सुदृढ बनाउन सो सहयोग प्रदान गरिएको हो। कम्पनीले एकीकृत वायरलेस र दूरसञ्चार प्रविधि प्रणालीका लागि आवश्यक हार्डवेयर तथा सफ्टवेयर सहयोग गरेको जनाएको छ।
सुरुमा कुनै प्रचारप्रसारबिना निजी रूपमा प्रदान गर्ने सोच बनाइएको भए तापनि सञ्चारमाध्यमहरूमा विषयले स्थान पाएपछि पहलपछाडिको भावना र उद्देश्य स्पष्ट पारिएको कम्पनीले बताएको छ।
सहयोगको आर्थिक मूल्यभन्दा पनि सुरक्षा निकायहरूको वास्तविक कार्यगत आवश्यकता सम्बोधन गर्नु आफ्नो मुख्य प्राथमिकता रहेको जनाउँदै कम्पनीले प्रविधिका माध्यमबाट सुरक्षाकर्मीहरूको कार्यसम्पादनलाई थप प्रभावकारी बनाउनु नै यस पहलको मुख्य ध्येय रहेको उल्लेख गरेको छ। “हामी ठूलो हृदय भएको कम्पनी हौँ, जसले आजका चुनौती समाधान गर्न भोलिको प्रविधि ल्याउने विश्वास राख्छ,” अडिडेलले भनेको छ।
यस पहललाई सफल बनाउन सहयोग पुर्याउने गृह मन्त्रालय, रक्षा मन्त्रालय, सञ्चार तथा सूचना प्रविधि मन्त्रालय, नेपाल दूरसञ्चार प्राधिकरण (NTA), सञ्चारमाध्यम तथा सम्पूर्ण सुरक्षा निकायहरूप्रति कम्पनीले आभार प्रकट गरेको छ। साथै, अहोरात्र खटिने अडिडेल परिवारका सदस्यहरू तथा विपद् व्यवस्थापन र जनताको सुरक्षामा निरन्तर खटिएका सुरक्षाकर्मीहरूप्रति उच्च सम्मान व्यक्त गरिएको छ।
प्रविधि व्यवसायका लागि मात्र नभई मानवता र राष्ट्रसेवाका लागि प्रयोग हुनुपर्ने भावनाका साथ आगामी दिनहरूमा पनि देशको आवश्यकता र जनहितलाई केन्द्रमा राखेर काम गर्ने प्रतिबद्धता कम्पनीले व्यक्त गरेको छ।
