सरकारमा कांग्रेसको नेतृत्व आवश्यक : कोइराला

 काँग्रेस     २३ भाद्र २०८०, शनिबार २१:२०     37 जनाले पढ़िसके



Spread the love

भरतपुर, २३ भदौ ।
नेपाली कांग्रेसका वरिष्ठ नेता डा. शेखर कोइरालाले अब सरकारमा कांग्रेसको नेतृत्व आवश्यक रहेको बताएका छन् । कोइरालाले देशको प्रधानमन्त्री प्रचण्ड गैरजिम्मेवार बन्दै गएकाले कांग्रेसको नेतृत्वमा सरकार बन्नुपर्ने धारणा राखेका हुन् । अहिले कांग्रेसका मन्त्रीहरुले केही गर्न नसकेको प्रसंङ्ग उल्लेख गर्दै कोइरालाले भने – ‘प्रधानमन्त्री र मुख्य सचिव बसेर निर्णय गर्छन् र त्यही सदर हुन्छ । त्यसैले अबको सरकार काङ्ग्रेसको नेतृत्वमा बन्न जरुरी छ ।’

कांग्रेसको चितवन जिल्ला सम्मेलनलाई सम्बोधन गर्दै देश जातीय द्वन्द्वमा जाने सम्भावना बढेकोले प्रचण्डले त्यसलाई उकास्ने काम गरेको आरोप लगाए । डाक्टर कोइरालाले भने, ‘केही समय अगाडि जातीय संस्थाको कार्यक्रममा प्रधानमन्त्रीले मलाई जिताउनोस् म जातीय राज्य दिन्छु, भन्नुभयो । देशको प्रधानमन्त्रीले यस्तो गैरजिम्मेवार कुरा गर्न मिल्दैन ।’

गाई काटेर खाएको प्रसङ्ग सम्झँदै कोइरालाले देशमा धार्मिक र सामाजिक सद्भाव कायम गर्न नसके अप्ठ्यारो परिस्थिति आउने बताए । लोकरिझ्याइँको नाममा चारैतिर अराजकता फैलिरहेको बताउँदै उनले भने – ‘देख्दा धार्मिक देखिएता पनि यसले जातिय द्वन्द्व फैलिन सक्छ ।’

नेता कोइरालाले गत स्थानीय तह र आमनिर्वाचनमा पटकपटक माओवादीलाई सघाउने निर्णय गर्नु काङ्ग्रेसको गल्ती र कमजोरी भएको स्मरण गर्दै भने – ‘हामीबाट गल्ती र कमजोरी भएको छ । यो निर्वाचन प्रणालीले कुनै पनि निर्वाचनमा कुनै दलको स्पष्ट बहुमत आउन सक्दैन । आजदेखि नै यो विषयमा छलफल गर्नुपर्छ । एमाले त मान्छ होला तर माओवादी मान्दैन ।’

कोइरालाले पार्टीभित्र व्यक्तिवादी चरित्र हावी भएको भन्दै चितवनका नेता तथा कार्यकर्तासँग वाचा गर्दै भने, ‘अब तपाईँहरुले अन्याय भोग्नु पर्दैन । अन्याय हुन म दिन्नँ, यो मेरो वाचा भयो । तपाईंहरुलाई म पुरै सहयोग गर्नेछु ।’ कार्यक्रममा नेता कोइरालाले चितवनका जेष्ठ नागरिकहरुलाई सम्मान समेत गरेका थिए।

त्यस्तै नेपाली कांग्रेसका बागमती प्रदेश सभापति इन्द्र बानियाँले कांग्रेसभित्र उत्साह सहित एकताका साथ अघि बढ्नुपर्ने बताए । बानियाँले गठवन्धनलाई इङ्गित गर्दै भने ‘ऐलेको कांग्रेस विचलित जस्तो देखिएको छ । अब कांग्रेसमा उत्साह र एकता जगाउनुपर्ने आवश्यकता छ ।’

कांग्रेसले १४औँ महाधिवेशनदेखि नै रुपान्तरित भएर अगाडि बढ्ने प्रतिबद्धता जाहेर गरेको कुरालाई कटाक्ष गर्दै बानियाँले भने – ‘भित्तामा रुपान्तरणको नारा त टाँस्यो तर मनमा टाँस्न सकेन । त्यसैले कांग्रेस विचलित देखिएको छ ।’
इतिहासले मात्रै काङ्ग्रेस नरहने बताउँदै बानियाँले भने ‘काङ्ग्रेस कसरी अगाडि बढ्ने नेतृत्वले बाटो देखाउनुर्‍यो ।’ उनले कांग्रेसले अब मुलुकको संविधान र पार्टीको विधान संशोधन गर्नुपर्ने धारणा व्यक्त गरे । अहिले कांग्रेस भित्र छाडातन्त्र मौलाएको भन्दै बानियाँले भने ‘ नेताले नीति निर्माण गर्ने हो, न्यायमुखी काम गर्ने हो । नेतामुखी टिकट बाँड्ने होइन ।’
बानियाँले पटकपटक व्यवस्था बदलेर पनि कांग्रेस जनतामुखी हुन नसकेको आरोप लगाए । व्यवस्था त बदलियो तर जनताको जीवनस्तर उही रहेको बताए । कांग्रेस भित्रै भ्रष्टाचार मौलाएको कुरालाई इङ्गित गर्दै बानियाँले भने ‘कांग्रेसको मिसन चुनाव होइन, भ्रष्टाचार शून्य सुशासन हो ।’

त्यस्तै सम्मेलनमा सभापतिको नीति तथा कार्यक्रम प्रस्तुत गर्दै जिल्ला सभापति राजेश्वर खनालले अहिले भैरहेको गठवन्धनको विकल्प खोज्न आवश्यक रहेको बताए । खनालले गठवन्धनले चितवन कांग्रेस बलियो भयो कि कमजोर भयो ? अहिलेको गठवन्धन भित्र कांग्रेसले आफ्नो स्वाभिमान कायम गर्न सकेको छ कि छैन ? भन्दै यक्ष प्रश्न राखेका थिए ।

कार्यक्रममा बोल्दै खनालले भने- ‘कुनै सार्वजनिक कार्यक्रमबाट फर्कँदै गरेका पार्टीका सह-महामन्त्रीले खुकुरी खानुपर्ने यो कस्तो सुरक्षा संयन्त्र हो ? यस्तो अवस्थामा अहिले भैरहेको सरकारको समर्थन गर्न सकिँदैन।’ अहिलेको गठवन्धन सरकारले हस्पिटलको लाइनमा बस्दाबस्दै कान्ति बाल अस्पतालमा ज्यान गुमाएकी पाँच वर्षीया बालिकालाई न्यायको पक्षमा सरकार किन मौन बस्यो ? भन्दै सभापति खनालले यसको जवाफ सरकारले दिनुपर्ने र भैरहेको गठवन्धनको विकल्प खोज्नुपर्ने धारणा व्यक्त गरे ।

कार्यक्रममा केन्द्रीय सदस्य टेकप्रसाद गुरुङ, अञ्जली श्रेष्ठ, पूर्वसभापति कृष्णलाल सापकोटा, विकास कोइराला निवर्तमान सभापति जीतनारायण श्रेष्ठलगायतले शुभकामना मन्तव्य राखेका थिए ।

कार्यक्रममा सभापतिको नीति तथा कार्यक्रम सभापति राजेश्वर खनालले प्रस्तुत गरेका थिए भने सचिव ध्रुवराज पोखरेलले सचिवको सांगठनिक प्रतिवेदन पेश गरेका थिए। त्यस्तै कोषाध्यक्षको आर्थिक प्रतिवेदन पवित्रा केसीले पेश गरेकी थिइन्। कार्यक्रमको सहजीकरण सचिव ध्रुवराज पोखरेलले गरेका थिए। फोटो : फाइल