सत्ता पक्षले जबरजस्ती संसद् अवरोध गरिरहेको छ, उसले नै खुलाउनुपर्छ : के. पी. ओली

 एमाले     ३१ श्रावण २०८०, बुधबार १७:१४     49 जनाले पढ़िसके



Spread the love

प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीले सत्ता पक्षले जबरजस्ती संसद् अवरुद्ध गरिरहेको भन्दै उसैले खुलाउनु पर्ने दाबी गरेका छन् । बुधवार शीतल निवासमा राष्ट्रपति रामचन्द्र पौडेललाई भेटेर निस्किने क्रममा सञ्चारकर्मीहरूलाई संक्षिप्त प्रतिक्रिया दिँदै उनले सत्ता पक्षले संसद् अवरुद्ध गरिरहेको दाबी गरेका हुन् ।

राष्ट्रपति पौडेलले पनि संसद् खुलाउनु पर्ने बताएको उनले जानकारी दिए । ‘उहाँ (राष्ट्रपति)ले संसद् खोल्दा राम्रो हुन्छ भन्नुभयो। मैले संसद् खोल्नै पर्छ, खुलाउनै पर्छ भनेँ,’ संसद् खोल्नेबारे केही कुरा भयो कि ? भन्ने सञ्चारकर्मीको प्रश्नमा ओलीले भने, ‘संसद् अवरुद्ध गर्नु हुँदैन भनेँ । सत्ता पक्षले जबरजस्ती अवरोध गरिरहेका छन । त्यो अवरोध सत्ता पक्षले नै खुलाउनुपर्छ ।’
विमानस्थल बाहिरबाट बरामद ६० किलो सुन प्रकरणको छानबिन गर्न उच्च स्तरीय समिति बनाउन माग गर्दै एमालेले साउन १० गतेबाट संसद् अवरुद्ध गर्दै आएको छ । सत्ता पक्षले भने उच्च स्तरीय छानबिन समिति बनाउन इन्कार गर्दै आएको छ ।

राष्ट्रपति पौडेलले लामो समय संसद् चल्न नसक्दा जनतामा नैराश्यता बढ्ने र संसदप्रति नै जनतामा नकारात्मक प्रभाव पर्ने भएकाले संसद्को गतिरोध अन्त्य गर्न ध्यानाकर्षण गराए ।

राष्ट्रपति पौडेलले सत्ता र प्रतिपक्षलगायत संसद्मा रहेका सबै दलहरूलाई विश्वासको वातावरण सिर्जना गरेर अघि बढ्न सुझाव समेत दिए ।

त्यस क्रममा प्रमुख प्रतिपक्षी दलका नेता ओलीले राष्ट्रपति पौडेलको स्वास्थ्य अवस्थाबारे चासो राखेका थिए ।