लमही– दाङमा बस दुर्घटना हुँदा १ जनाको मृत्यु भएको छ। दुर्घटनामा ११ जना घाइते भएका छन्।
लमहीबाट भालुवाङतर्फ जाँदै गरेको लु२ख ७८५ नम्बरको बस र वीरगञ्जबाट दाङको तुलसीपुर आउँदै गरेको ना५ख ४८९८ नम्बरको बस आज (शुक्रबार) बिहान लमही नगरपालिका–३ फल्कापुरमा एकापसमा ठोक्किएका हुन्। मृत्यु हुनेमा रोल्पाको रुन्टीगढी–७ की ४२ वर्षीया शोभा परियार रहेको जिल्ला प्रहरी कार्यालय दाङका प्रहरी प्रवक्ता राजनकुमार गौतमले जानकारी दिए।
बाराबाट इँटाभट्टामा काम गरी रोल्पा फर्किँदै गरेका मजदुर सवार बस दुर्घटनामा परेका हुन्। बसका चालक तुल्सीराम रामिजाल गम्भीर घाइते भएका छन्। दुर्घटनामा परी मृतक शोभाका दुई छोरा पनि घाइते भएका छन्।
घाइतेलाई उपचारका लागि बुटवल, भैरहवा र नेपालगञ्ज पठाइएको वडा प्रहरी कार्यालय लमहीका प्रहरी निरीक्षक शङ्कर श्रेष्ठले जानकारी दिए।
