सुदूरपश्चिम प्रदेशका मुख्यमन्त्री खगराज भट्टले बडिमालिका भगवती माताको विधिपूर्वक पूजाआजा गरी परम्परागत पेटारो बडिमालिकातर्फ प्रस्थान गराएका छन्।
सुदूरपश्चिमको धार्मिक, ऐतिहासिक तथा सांस्कृतिक महत्व बोकेको बडिमालिका पूजाका लागि मुख्यमन्त्री भट्टले प्रदेश सरकारका मन्त्री, सचिव तथा अन्य सम्बन्धित व्यक्तिहरूको उपस्थितिमा विधिपूर्वक पूजा–अर्चना गरेका हुन्। पूजापछि परम्परागत विधिअनुसार पेटारोलाई बडिमालिकातर्फ प्रस्थान गराइएको हो।
बडिमालिकामा पूजा गर्न डोटीबाट पेटारो पठाउने परम्परा लामो समयदेखि चलिआएको धार्मिक तथा सांस्कृतिक परम्परा हो। पेटारोमा बडिमालिका भगवतीलाई चढाइने विशेष पूजा सामग्री राखिने र सरकारी पूजा टोलीले पैदल यात्रामार्फत बडिमालिका पुगेर निर्धारित विधिअनुसार पूजा गर्ने परम्परा रहेको छ।
परम्पराअनुसार पेटारो पठाउने क्रममा विभिन्न धार्मिक स्थलमा पूजाआजा गर्दै सरकारी पूजा टोली बडिमालिकातर्फ अघि बढ्ने गर्छ। बडिमालिका पुगेपछि डोटी, बाजुरा र जुम्लाबाट पुगेका सरकारी पूजा टोलीबीच समन्वय गरी मुख्य पूजामा सहभागी हुने परम्परा छ।
बडिमालिकाको यस वर्षको मुख्य पूजा भदौ ११ गते हुने भए पनि दर्शनार्थीको बढ्दो चापलाई मध्यनजर गर्दै भदौ १ गतेदेखि नै मन्दिरमा पूजा तथा मेला सुरु गरिएको छ।
पेटारो पठाउने परम्पराले बडिमालिका भगवतीप्रतिको धार्मिक आस्थालाई मात्र नभई सुदूरपश्चिमको इतिहास, संस्कृति र मौलिक परम्परालाई समेत जीवन्त राख्दै आएको छ।
राज्यस्तरबाट निरन्तरता दिइँदै आएको यस धार्मिक तथा सांस्कृतिक परम्पराको संरक्षण र प्रवर्द्धनमा प्रदेश सरकारले पनि निरन्तरता दिँदै आएको छ।
