झापाको कनकाई नगरपालिकामा ट्याक्टर र मोटरसाइकल एकआपसमा ठोक्किँदा दुई जनाको मृत्यु भएको छ भने एक जना गम्भीर घाइते भएका छन्।
शुक्रबार दिउँसो झापाको कनकाई नगरपालिका–५, तुलसीबारीस्थित भित्री सडक खण्डमा सुरुङ्गाबाट झापा बजारतर्फ जाँदै गरेको मे ४ प ५८५ नम्बरको मोटरसाइकल र खेत जोतेर सडकतर्फ निस्कँदै गरेको मे १ त ७४०४ नम्बरको ट्याक्टर एक–आपसमा ठोक्किएका हुन्।
दुर्घटनामा परी मोटरसाइकल चालक झापा गाउँपालिका–३ का समिर अली र मोटरसाइकलको पछाडि सवार उनकी पाँच वर्षीया छोरी हाजिरा खातुनको मृत्यु भएको छ।
दुर्घटनालगत्तै तीनै जना घाइतेलाई उपचारका लागि सुरुङ्गास्थित कन्काई अस्पताल पु¥याइएको थियो। चिकित्सकले समिर र हाजिरालाई मृत घोषणा गरेको प्रहरीले जनाएको छ।
दुर्घटनामा परी मोटरसाइकलको पछाडि सवार समिरकी आमा नुरेश सादेवी गम्भीर घाइते भएकी छन्। उनको अवस्था गम्भीर रहेकाले थप उपचारका लागि बिर्तामोडस्थित बीएन्डसी अस्पताल पठाइएको छ।
प्रहरीले दुर्घटनामा संलग्न मोटरसाइकल, ट्याक्टर र ट्याक्टर चालक कनकाई नगरपालिका–५ का ४६ वर्षीय चक्रबहादुर तामाङलाई नियन्त्रणमा लिएको छ।
