इजरायली सेनाले कब्जा गरिएको वेस्ट ब्यांकमा पक्राउ गरेका अल जजिराका संवाददाता मोन्टासेर नासरसहित अन्य व्यक्तिलाई केही घण्टापछि रिहा गरिएको छ ।
मंगलबार बिहान इजरायली सेनाले दक्षिणी वेस्ट ब्यांकको हेब्रोन सहरनजिकै पर्ने डुरास्थित नासरको घरमा छापा मारेर उनलाई पक्राउ गरेको थियो ।
पक्राउका क्रममा नासरको आँखामा पट्टी बाँधिएको र हातमा हतकडी लगाइएको अवस्थामा उनलाई सैनिक गाडीमा राखेर लगिएको दृश्य सार्वजनिक भएको थियो ।
अल जजिराका संवाददाता मोहम्मद अल अत्रासले हेब्रोनबाट दिएको जानकारीअनुसार डुरामा गरिएको सैन्य कारबाहीका क्रममा नासरसहित कम्तीमा २० जना प्यालेस्टिनी पक्राउ परेका थिए । केही घण्टापछि इजरायली सेना उक्त क्षेत्रबाट फर्किएको थियो ।
अल अत्रासका अनुसार नासरकी श्रीमतीले दिएको जानकारीअनुसार उनी घरको ढोकातर्फ जाँदै गर्दा आफ्नो आवासीय भवनतर्फ सैनिकहरू अघि बढिरहेको देखेका थिए । त्यसपछि सेनाले उनको घरमा प्रवेश गरेको थियो ।
अल अत्रासले भने, ‘सेनाले घरभित्र प्रवेश गरेर हाम्रा सहकर्मी मोन्टासेरकी श्रीमतीमाथि दुर्व्यवहार गर्यो । त्यसपछि नासरको व्यक्तिगत मोबाइल फोनसमेत जफत गर्यो ।’
त्यसपछि मंगलबार बिहान करिब २ः३० बजे (ग्रिनविच समयअनुसार ००ः३० बजे) नासरलाई अन्य पक्राउ परेकाहरूसँगै लगिएको थियो ।
अल अत्रासले वेस्ट ब्यांकमा यस्ता सैन्य छापा दैनिकजसो हुने गरेको बताए । पक्राउ परेकाहरूलाई या त जेलमा राखिन्छ वा इजरायलको आन्तरिक सुरक्षा निकाय शिन बेटका अधिकारीहरूले सोधपुछ गरेपछि रिहा गरिन्छ ।
उनका अनुसार इजरायलले हाल कम्तीमा ४० जना प्यालेस्टिनी पत्रकारलाई हिरासतमा राखेको छ । तीमध्ये आधाजति कुनै अभियोग नलगाई प्रशासनिक हिरासतमा राखिएका छन् ।
वेस्ट ब्यांकमा प्यालेस्टिनी पत्रकारमाथि दबाब र दमन बढिरहेका बेला नासर पक्राउ परेका हुन् ।
प्यालेस्टिनी पत्रकार महासंघका अनुसार अगस्ट महिनामा मात्रै इजरायली सेना र बस्ती विस्तारकारीहरूबाट पत्रकारितामाथि ८४ वटा उल्लंघनका घटना भएका थिए । ती घटनामा पत्रकार पक्राउ पर्ने र हिरासतमा एक जनाको मृत्यु हुने घटनासमेत समावेश छन् ।
गत साता पनि इजरायली सेनाले हेब्रोनस्थित अल गद टेलिभिजनको कार्यालयमा छापा मारेको थियो । यसअघि सन् २०२४ मा इजरायलले वेस्ट ब्यांकको रामल्लाहस्थित अल जजिराको कार्यालयमा छापा मार्दै प्रसारण केन्द्र बन्द गराएको थियो ।
