नेकपा एमालेको निर्वाचन समीक्षा तथा पार्टी पुनर्गठन कार्यदलको बैठक बस्दै छ ।
कार्यदलमा सहमति जुट्न नसकिरहेका बेला बस्न लागेको बैठकलाई पुनर्गठनको विषयमा निर्णायक मानिएको छ । बैठकमा अध्यक्ष केपी शर्मा ओलीको निर्देशनमा कार्यदल सदस्य नरहेका नेता प्रदीप ज्ञवालीले तयार पारेको छुट्टै प्रतिवेदनसमेत छलफलका लागि प्रस्तुत हुने भएको छ ।
ज्ञवालीले तयार पारेको २९ पृष्ठको प्रतिवेदनमा महासचिव शंकर पोखरेलले तयार पारेको प्रतिवेदनमा रहेको नेतृत्व परिवर्तनसम्बन्धी मूल विषय हटाइएको छ । त्यसको सट्टा ओली नेतृत्वको राजनीतिक तथा सांगठनिक भूमिकाको व्याख्या गर्दै निर्वाचन पराजयलाई व्यक्ति विशेषका कारण मात्र भएको मान्न नसकिने निष्कर्ष प्रस्तुत गरिएको छ ।
यसअघि कार्यदल संयोजक रामबहादुर थापा ‘बादल’ र सदस्य सचिव पोखरेलले छुट्टाछुट्टै प्रतिवेदन तयार गरेका थिए । दुवै प्रतिवेदनलाई एउटै बनाउने प्रयास भए पनि सहमति जुट्न सकेको थिएन । त्यसपछि थप गृहकार्यका लागि थापा, उपाध्यक्ष विष्णु पौडेल र पोखरेललाई जिम्मेवारी दिइएको थियो ।
तर, त्यसबाट पनि सहमति नजुटेपछि कार्यदलमा पुनः नयाँ प्रतिवेदनको प्रवेश भएको हो । ज्ञवाली कार्यदलका सदस्य भने होइनन् । उनीसँग अध्यक्ष ओलीले छुट्टै प्रतिवेदन तयार गर्न भनेको र सोहीअनुसार प्रतिवेदन तयार भएको समाचार सार्वजनिक भएको छ ।
पुनर्गठन पक्षधर नेताहरूले भने ज्ञवालीको प्रतिवेदनलाई कार्यदलको मूल म्यान्डेटअनुसार तयार भएको प्रतिवेदनका रूपमा स्वीकार गर्न नसकिने बताउँदै आएका छन् । एक कार्यदल सदस्यका अनुसार आजको बैठकमा पोखरेलले तयार पारेको प्रतिवेदनलाई नै आधार बनाएर निर्णयमा पुग्ने तयारी छ ।
कार्यदलमा पुनर्गठन पक्षधरको बहुमत रहेको दाबीसमेत यसअघि सार्वजनिक भएको थियो । यद्यपि, कार्यदलमा मत विभाजनको वास्तविक अवस्था बैठकको निर्णयबाटै स्पष्ट हुनेछ ।
कार्यदलको विवाद अब प्रतिवेदनको विषयमा मात्र सीमित छैन । निर्वाचन पराजयको समीक्षा कसरी गर्ने र त्यसको राजनीतिक तथा सांगठनिक जिम्मेवारी कसरी निर्धारण गर्ने भन्ने प्रश्नसमेत यससँग जोडिएको छ ।
पोखरेलको प्रतिवेदनमा कार्यकर्ताबाट संकलित सुझावलाई आधार बनाइएको बताइएको छ भने थापाको प्रतिवेदनले वर्तमान नेतृत्वको निरन्तरताको पक्ष लिएको छ । ज्ञवालीको नयाँ प्रतिवेदनले पनि नेतृत्व परिवर्तनको प्रस्ताव अस्वीकार गरेको विवरण सार्वजनिक भएको छ ।
आजको बैठकमा सहमति नजुटे विवादित विषय थप माथिल्लो तहमा जाने सम्भावना छ । बैठकपछि एमाले सचिवालयको बैठकसमेत बस्ने र त्यसले आगामी केन्द्रीय कमिटी बैठकका एजेन्डा तय गर्ने कार्यक्रम छ ।
यससँगै कार्यदलको आजको बैठक एमालेभित्रको पुनर्गठन बहसलाई सहमतिमा टुंग्याउने कि मत विभाजनसहित अघि बढाउने भन्ने महत्वपूर्ण मोड बन्ने देखिएको छ ।
