सिंहदरबार गेटमै धर्ना बसेकी एक महिलालाई प्रहरीले बल प्रयोग गरेर हटाएको छ । आफूलाई घरायशी हिंसा पीडित बताउने बिनु यादव तीन दिनदेखि देशको प्रशासनिक केन्द्र सिंहदरबारको गेटमा धर्ना दिइरहेकी छन् ।
गत सोमबार बिनु र अर्की ‘पीडित’ निहारिका राजपूत सिंहदरबार प्रवेश गर्न खोज्दा गेटमा रोकिएका थिए । भित्र जाने पास भएर पनि प्रहरीले रोकेपछि उनीहरु गेटमै धर्ना बसे । राती उनीहरुलाई प्रहरीले उठाएर हिरासतमा राखेको थियो ।
भोलिपल्ट निहारिकाको सानो बच्चा बिरामी भएपछि अस्पताल उपचारका लागि लगियो र उनी त्यहाँबाट घरतिर लागिन् । बिनु भने सिंहदरबारमै लडिरहेकी छन् । उनलाई राति प्रहरीले उठाएर हिरासत लैजान्छ भने बिहान छाडिदिने गरेको छ । छुटेलगत्तै उनी सिंहदरबार गेटमा पुग्छिन् ।
आज सिंहदरबार गेटमा एमालेका कार्यकर्ताले पनि प्रदर्शन गरेका थिए । उनीहरुसँगै बिनुलाई पनि पक्राउ गरेर हिरासतमा लगियो । एमाले कार्यकर्ता हिरासतमै छन् भने फरक विषय भएकाले बिनुलाई तुरुन्तै छोडिएको थियो । हिजो एमाले नेता महेश बस्नेतले आफ्नो पक्षमा स्टाटस लेखेपछि प्रहरीले आफूलाई थप कडाइ गरेको बिनुको दावी छ ।
बिनु र निहारिका दुवैले प्रहरीबाटै अन्यायमा परेको भन्दै निवेदन लिएर गृह मन्त्रालय जान खोजेका थिए । गृहमन्त्री सुधन गुरुङलाई नै भेटेर गुनासो सुनाउने उनीहरुको प्रयास छ । तर, भित्रबाट रोक्ने आदेश आएपछि पास भए पनि उनीहरु छिर्न पाएनन् ।
