अमेरिकी राष्ट्रपति डोनाल्ड ट्रम्पका अनुसार फाँसी दिइने भनिएका आठ इरानी महिला प्रदर्शनकारीलाई अब फाँसी दिइने छैन।
तर, इरानले भने यी महिलाहरूलाई फाँसी दिने कुनै योजना नै नभएको स्पष्ट पारेको छ।
डोनाल्ड ट्रम्पले ट्रुथ सोसल प्लेटफर्ममा लेखेका छन्, “धेरै राम्रो खबर आइरहेको छ। मलाई जानकारी दिइएको छ कि ती आठै महिला प्रदर्शनकारीलाई मारिने छैन। चार जनालाई तुरुन्तै रिहा गरिनेछ र बाँकी चार जनालाई एक महिनासम्म जेलमा राखिनेछ। अमेरिकी राष्ट्रपति भएको नाताले मैले गरेको अपीललाई मान्दै यी महिलाहरूको फाँसीको सजाय रद्द गरेकोमा म इरान र त्यहाँका नेताहरूको प्रशंसा गर्छु।”
ट्रम्पले मंगलबार यी महिलाहरूको विषयमा इरानी शासनसँग प्रश्न गरेका थिए र उनीहरूको रिहाइलाई “हाम्रो वार्ताको राम्रो सुरुवात हुनेछ” भनेर बताएका थिए।
यो घटनाक्रम त्यसबेला आएको हो जब जनवरीमा भएका सरकारविरोधी प्रदर्शनमा सहभागी यी महिलाहरूलाई इरानमा फाँसी दिइने भन्ने खबरहरू बाहिर आएका थिए।
बीबीसी अरबीका अनुसार, इरानी न्यायपालिकासँग सम्बन्धित मिजान समाचार एजेन्सीले भनेको छ, “ट्रम्प झुटा समाचारबाट भ्रमित भएका हुन्, जुन विरोधी मिडिया च्यानलहरूले फैलाएका थिए। केही महिलाहरू पहिले नै रिहा भइसकेका छन् र बाँकीमाथि यस्ता आरोप छन् जसमा मृत्युदण्डको व्यवस्था छैन।”
युद्ध सुरु भएदेखि यता इरानले एक दर्जनभन्दा बढी मानिसलाई फाँसी दिएको छ। तीमध्ये केहीमाथि इजरायलका लागि जासुसी गरेको आरोप थियो भने केही यस वर्षको सुरुवातमा भएका सरकारविरोधी प्रदर्शनमा सहभागी थिए।
