गएका पाँच दिनसम्म लगातार बढेर दिनहुँ महँगो मूल्यको रेकर्ड बनाउँदै आएको सुनको भाउ आज घटेको छ। सुनको मूल्य आज तोलामा एक हजार पाँचसय रुपैयाँ घटेको हो।
मूल्य घटेर आज सुन तोलाको दुई लाख ७६ हजार पाँचसय रुपैयाँमा झरेको नेपाल सुनचाँदी व्यवसायी महासंघले जनाएको छ।
सुनको मूल्य बुधबार तोलामा एक हजार पाँचसय रुपैयाँ बढेर दुई लाख ७८ हजार रुपैयाँ पुगेको थियो। सुनको यो मूल्य हालसम्मकै सबैभन्दा बढी हो।
सुनको मूल्य गएको शुक्रबार तोलाको २१ सय, आइतबार दुई हजार आठसय, सोमबार चार हजार एकसय र मंगलबार एक हजार आठसय रुपैयाँ बढेको थियो।
पाँच दिनमा सुनको भाउ तोलामा १२ हजार तीनसय रुपैयाँ बढेर आज सस्तिएको हो।
त्यसैगरि आज चाँदीको मूल्य पनि घटेको छ। हिजो अहिलेसम्मकै उच्च बनेको चाँदीको भाउ आज तोलामा १७० रुपैयाँ घटेर पाँच हजार चारसय ८५ रुपैयाँमा झरेको हो।
हिजो चाँदीको भाउ तोलामा ३१५ रुपैयाँ बढेर पाँच हजार ६ सय ५५ रुपैयाँ पुगेको थियो। चाँदीको यो मूल्य हालसम्मकै महँगो हो।
