छठयता सेयरबजारमा क्रमशः सुधार देखिएको छ। लगातार तेस्रो दिन कारोबार रकम बढ्दै गएको हो।
साताको अन्तिम कारोबार दिन आज नेप्से ३४.२२ अंकले बढेर २६००.३८ विन्दुमा पुगेको छ। योसँगै कुल ७ अर्ब ५१ करोड बढीको सेयर किनबेच भएको नेपाल स्टक एक्सचेन्जले जनाएको छ।
बिहीबार २ करोड ६० लाख कित्ता सेयर बिक्रीपछि सो परिमाणको कारोबार भएको हो। यस दिन २१६ वटा सेयरको मूल्य बढ्दा २८ वटाको घटेको र ५ वटाको अघिल्लो मूल्यमा किनबेच भएको छ।
अन्तिम कारोबार दिन गुराँस लघुवित्त र उन्नति सहकार्य लघुवित्तको सेयर १० प्रतिशतले बढेको छ। यसबाहेक सुपरमादी हाइड्रोपावर ९.५४, गणपति लघुवित्त ९.४६ प्रतिशत र पिपुल्स हाइड्रोपावर कम्पनी ९.०८ प्रतिशतले उकालो लागेका छन्।
आज गिरावटमा अधिकतम ५.७० प्रतिशतसम्मले सेयरहरु घटेका छन्।
सर्वाधिक कारोबारमा हिमालयन बैंक प्रोमोटर सेयर १ अर्ब ६६ करोडको किनबेच भएको छ। यो सेयर प्रतिकित्ता १३१ रुपैयाँ अन्तिम मूल्यमा कारोबार भएको हो।
