२० दिनदेखि जारी शिक्षकहरूको आन्दोलनमा आज एउटा रोचक घटना घट्यो । शिक्षकहरू यथाशीघ्र विद्यालय शिक्षा ऐन जारी गर, हाम्रो माग पूरा गर, भन्दै नारा लगाउँदै अगाडि बढिरहेका थिए ।
त्यही बेला एक फरक गेटअपमा देखिए । र उनी शिक्षकहरूले गरिरहेको आन्दोलन कहिलेसम्म हो भन्दै प्रश्न गर्न थाले। जसले आन्दोलन गरिरहेका थिए तिनीहरूकै विरुद्धमा बोल्न थालेपछि मिडियाका क्यामेरा उनीतिर तेर्सिए ।
त्यसरी शिक्षकहरूकै आन्दोलनमा गएर उनीहरूकै विरुद्धमा बोल्ने व्यक्ति थिए,– ललितपुरको गोदावरीका सनोज महत ।
उनले आफ्नो छोरी सरस्वती माध्यमिक विद्यालयमा पढ्न गरेको बताएका थिए । उनले आफू अभिभावक भएको बताउँदै उनले छोरीले पढ्न नपाएको बताएका थिए ।
उनले आफ्नी छोरी विद्यालय पढ्न नपाएको भन्दै शिक्षकहरूलाई विद्यालयमा फर्काउन आएको बताएका थिए । त्यही बेला उनीमाथि आन्दोलनरत शिक्षकहरूले हातपात गरेका थिए ।
नयाँ बानेश्वरस्थित आर्कब्रिजको सडकमा उनीमाथि शिक्षकहरूले हातपात गरेपछि प्रहरीलाई बुझाएका थिए ।
शिक्षकहरूले भने उनीमाथि आन्दोलन भाँड्न घुसपैठ गरेको आरोप लगाएका छन् ।
सडकमा उत्रिएका उनले आफ्नो छोरीको भर्ना हुन नपाएपछि सडकमा आएको बताएका थिए ।
शिक्षकहरूले भने बारबार बाहिर जानुस् भन्दै उनलाई हटाउन खोजेका थिए । बाहिर जानुस् भन्दै शिक्षकहरूले हातपात गरेका हुन् ।
उनले शिक्षकहरूलाई आन्दोलनको मोडालिटि परिवर्तन गर्न भनेका थिए । ‘मेरो बच्चा सरकारी स्कुलमा पढ्छ, बन्द गरेर मेरो बच्चाको भविष्य वर्वाद गर्न पाइँदैन’, उनले भने ।
आफ्नो लागि जे भने पनि शिक्षक नै भएको बताउँदै उनले शिक्षकहरूलाई आन्दोलनको स्वरूप फेर्न भनेका थिए ।
विद्यार्थी नपढाएर, सडकमा भेला भएर नाचेर बस्न नपाइने उनको भनाइ थियो । महतले भिडमा आएर बोलेपछि आन्दोलनरत शिक्षकहरूले उनलाई रोकेका थिए । उनीहरुले उनलाई आन्दोलनमा आएर गुण्डागर्दी नगर्न समेत भनेका थिए ।
आज आफू एक जना मात्रै आएको तर, भोलिदेखि अरू अभिभावक पनि आउने बताएका थिए । यति कुरा गर्दै गर्दा उनीमाथि शिक्षकहरू झम्टिन थाले। यतिकैमा प्रहरी आएर उनलाई बाहिर पठाएको थियो ।
प्रहरीले समातेर बाहिर लैजाँदै गर्दा समेत शिक्षकहरूको कुटपिट गरेका थिए । यतिसम्म कि एक जनाले प्रहरीले समातेर लगिरहेको बेला उडेर माथिबाट हानेका थिए भने अन्यले समेत झम्टिन थालेका थिए ।
एकीकृत अखिल नेपाल शिक्षक सङ्गठनका अध्यक्ष शङ्कर अधिकारीले शिक्षकका विरुद्धमा नाराबाजी गर्न थालेपछि नियन्त्रणमा लिएर प्रहरीको जिम्मा लगाएको बताए ।
