सबैभन्दा बढी असर चाहिँ मेक्सिको र क्यानडालाई पर्ने छ। किनकि उनीहरू अमेरिकी अर्थतन्त्रमा भारी मात्रामा निर्भर छन्। ६ वर्षअघि दुवै मुलुकले ट्रम्पसँगै नयाँ व्यापार सम्झौता गरेका थिए। ट्रम्पले २५ प्रतिशत भन्सार महसुल लगाइराखे दुवै मुलुक मन्दीमा जाने अर्थशास्त्रीहरूको भनाइ छ।
‘कोही पनि सुरक्षित छैन,’ अमेरिकी अर्थ मन्त्रालयका पूर्वअधिकारी ब्राड सेट्सर भन्छन्, ‘ट्रम्पसँग सबैभन्दा ठूलो व्यापार सम्झौता गरेका दुई देशमाथि सबैभन्दा पहिले कर लाग्यो।’
ट्रम्पले अहिले लगाएको कर पूर्ण रूपमा कार्यान्वयन भए यसको असर अघिल्लोपालि चीन र जी७ मुलुकसँगको व्यापार युद्धको भन्दा ज्यादा पर्ने बताइन्छ।
‘यो अझ ठूलो व्यापार युद्ध हुन सक्छ,’ अक्सफोर्ड इकोनोमिक्सका प्रमुख अर्थशास्त्री रायन स्विट भन्छन्, ‘पहिलो चरणको ज्यादा केन्द्रित थियो। यसपालि विस्तृत हुने देखिन्छ, त्यो पनि सोचेभन्दा छिटो।’
ट्रम्पका पूर्व आर्थिक सल्लाहकार एभरेट आइसनस्टाट भन्छन्, ‘मैले भन्सार महसुल अलि नापजोख गरेर आउला भन्ने सोचेको थिएँ। तर, अब हामी के भन्न सक्छौँ भने यो एउटै दिशातिर गइरहेको छ। झनै चर्किने देखिन्छ।’
अर्थशास्त्रीहरू मेक्सिको, क्यानडा र चीनमाथिको कर सुरुवात मात्र भएको बताउँछन्। ट्रम्प प्रशासनका अधिकारीहरूले अमेरिकामा आयात सम्पूर्ण सामग्रीमा भन्सार महसुल बढाउने तयारी गरिरहेको बताइन्छ।
ट्रम्पले खर्बौं डलर कर कटौती गर्ने बताएका छन्। सो रकम भन्सार महसुलबाट उठाउने उनको तयारी देखिएको विज्ञहरूको भनाइ छ। यसमा उनले पार्टीबाट पनि कुनै विरोधको सामना गर्नुपरेको छैन।
तर, उनका सामु दुई ठूला खतरा रहेको अर्थशास्त्रीहरू औँल्याउँछन्। एक त सेयर बजारमा पहिरो र अर्को मुद्रास्फिति। विश्व अर्थतन्त्रका लागि भने कोभिड महामारीले जस्तै भयानक असर गर्नसक्ने आईएनजी नामक वित्तीय सेवा प्रदायक कम्पनीका अर्थशास्त्री जेम्स नाइट्ली बताउँछन्।
‘जोखिम के छ भने यसले निकै ठूलो क्षति गर्न सक्छ, खासगरी मुलुकहरूको जवाफी कारबाही ठूलो भयो भने,’ उनी भन्छन्, ‘र, राजनीतिकर्मीले जवाफ नदिने स्थिति म देख्दिनँ।’ एजेन्सी
