अमेरिका र इरानबिच जारी युद्धले मध्यपूर्वमा तनाव झन् तीव्र बनाएको छ। पछिल्लो समय अमेरिकाले हवाई आक्रमण विस्तार गरेको छ भने इरानले कडा प्रतिकार गरिने चेतावनी दिएको छ।
यस्तै हुथी विद्रोहीले समुद्री गतिविधि बढाएको छ भने कुवेतको हवाई सुरक्षा सक्रिय पारिएको छ। जसका कारण तेलको मूल्य फेरि आकासिएको छ।
अमेरिकी सेनाले लगातार १२औँ रात इरानमा हवाई आक्रमण गरेको छ। अमेरिकी सेन्ट्रल कमान्डका अनुसार आक्रमण अभियान निरन्तर जारी छ।
इरानका सरकारी सञ्चारमाध्यमहरूले दक्षिणपश्चिमका रामसिर र अहवाज सहर तथा खाडी तटीय बुसेहर प्रान्तमा अमेरिकाले क्षेप्यास्त्र हानेको उल्लेख गरेका छन्।
यसैबिच अमेरिकाले साउदी अरेबियासँग नागरिक आणविक सहयोगसम्बन्धी ऐतिहासिक सम्झौता गरेको छ। उक्त सम्झौताले साउदी अरेबियामा नागरिक आणविक कार्यक्रम विकासका लागि कानुनी आधार दिनेछ।
अमेरिकाले सम्झौतामा आणविक हतियार प्रसार रोक्न आवश्यक सुरक्षा प्रबन्ध समावेश गरिएको जनाएको छ।
यता कुवेतको सेनाले इरानी आक्रमणपछि बिहीबार बिहान आफ्नो हवाई प्रतिरक्षा प्रणालीले शत्रुपक्षका ड्रोन रोकेको जनाएको छ।
सेनाले सुनिएका विस्फोट हवाई प्रतिरक्षा प्रणालीले ड्रोन खसाल्दा भएको बताएको छ।
इरानको विदेशमन्त्री अब्बास अराघचीले अमेरिकाले इरानी पूर्वाधारमा आक्रमण गरे त्यसको शक्तिशाली र निर्णायक जवाफ दिइने चेतावनी दिएका छन्।
अमेरिकाका राष्ट्रपति डोनाल्ड ट्रम्पले हर्मुज जलघाँटीमा लक्षित प्रत्येक जहाज आक्रमणको बदलामा इरानका पुल वा विद्युत् केन्द्र ध्वस्त पार्ने चेतावनी दिएपछि अराघचीको प्रतिक्रिया आएको हो।
इरानको रक्षा सिद्धान्त ‘जस्तो आक्रमण, त्यस्तै प्रतिकार’ भएको अराघचीले उल्लेख गरेका छन्।
ट्रम्पले युद्धमा अमेरिकाले हालसम्म ३७ अर्ब ५० करोड अमेरिकी डलर खर्च गरिसकेको उल्लेख गर्दै आवश्यक परे थप कदम चालिने चेतावनी दिएका छन्।
यमनका इरान समर्थित हुथी विद्रोहीले लाल सागरमा साउदी कम्पनीको एउटा तेल ट्यांकरमा आक्रमण गरेको दाबी गरेका छन्।
हुथीहरूले यसअघि साउदी बन्दरगाहहरूमा समुद्री नाकाबन्दी गर्ने चेतावनी दिएका थिए।
पाँच महिनादेखिको युद्धका कारण हर्मुज जलघाँटीको आवागमन पनि प्रभावकारी रूपमा प्रभावित बनेको छ।
अन्तर्राष्ट्रिय चेम्बर अफ सिपिङ (आईसीएस) का अनुसार हुथी विद्रोहीहरूले लाल सागर क्षेत्रमा सञ्चालनरत जहाजहरूलाई रेडियोमार्फत चेतावनी सन्देश पठाउन थालेका छन्।
यसैबिच युद्धको असर विश्व ऊर्जा बजारमा पनि देखिएको छ।
अन्तर्राष्ट्रिय बजारमा ब्रेन्ट कच्चा तेलको मूल्य करिब छ सातापछि पहिलोपटक ९५ अमेरिकी डलर नाघ्दै ९५ डलरको हाराहारीमा पुगेको छ भने अमेरिकी सूचक वेस्ट टेक्सास इन्टरमिडियट (डब्लुटीआई) को मूल्य पनि करिब तीन प्रतिशत वृद्धि भएको छ।
