सम्पत्ति शुद्धीकरण मुद्दामा पक्राउ परेका उद्योग बाणिज्य महासंघका पूर्वअध्यक्ष शेखर गोल्छा पक्राउ परेको पहिलो रात निदाउन नसकेको गुनासो गरेका छन्।
शुक्रबार बिहानै त्रिवि शिक्षण अस्पताल महाराजगञ्जमा स्वास्थ्य परीक्षण गराइएको छ ।
बिहीबार साँझ प्रहरीको केन्द्रीय अनुसन्धान व्युरो (सिआईबी)को टोलीद्वारा पक्राउ गरिएका गोल्छालाई लाजिम्पाटस्थित सिआईबीकै हिरासतमा राखिएको थियो । स्वास्थ्यमा कुनै जटिलता रहेकोबारे प्रहरीले सोध्दा उनले केही भनेनन् । तर, रातभरि सुतेनन् ।
प्रहरीले हिरासतमा राखिएका व्यक्तिको सामान्य स्वास्थ्य परीक्षण गर्ने गरेको छ । त्यसअनुसार शुक्रबार विहानै उनलाई त्रिवि शिक्षण अस्पताल, महाराजगञ्ज लगियो । फेरि म्याद थपको तयारीका निम्ति सिआईबीकै हिरासतमा फर्काइएको थियो ।
शुक्रबार राति उनले ‘सुत्न सकिनँ’ भनेपछि उनको सहजताका लागि एकजना इन्स्पेक्टरलाई खटाइएको थियो । ती इन्स्पेक्टरसँग पनि उनले खुलेरे केही बोलेनन् ।
सिआईबी प्रमुख एआईजी डा. मनोज केसीले यदि गोल्छाको स्वास्थ्यमा कुनै समस्या छ भने वीर वा शिक्षण अस्पतालमा उपचारका लागि लैजान सकिने बताए । तर, स्वयं गोल्छाले आफूलाई कुनै स्वास्थ्यसम्बन्धी असहजता भएको बताएका छैनन् ।
‘उहाँले केही भन्नुभएको छैन, तर नसुत्ने कुराले समस्या हुनसक्छ, त्यसैले हामी डाक्टरहरुसँग परामर्श गर्छौं’, डा.केसीले भने ।
मुद्दाको अनुसन्धानका लागि उनलाई अहिले केही समयमै जिल्ला अदालत काठमाडौंमा उपस्थित गराइने तयारी छ । सम्पत्ति शुद्धीकरण अनुसन्धान विभागको सिफारिसमा सिआईबीले उनलाई पक्राउ गरेको हो ।
उनीविरुद्धको मुद्दाको अनुसन्धान र अन्य प्रक्रिया सम्पत्ति शुद्धीकरण अनुसन्धान विभागबाट नै अगाडि बढाइने भएको छ । डा. केसीका अनुसार प्रहरीले हिरासतमा राख्ने काम मात्रै गरेको हो ।
