इरानका सर्वोच्च नेता आयतोल्लाह अली खामेनी र शीर्ष सैन्य कमाण्डरहरूको हत्या भएपछि मध्यपूर्व र दक्षिण एसियामा तनाव चरम सीमामा पुगेको छ। अमेरिका र इजरायलले इरानको राजधानी तेहरानमा गरेको संयुक्त सैन्य कारबाहीमा खामेनीसहित २ सयभन्दा बढी व्यक्तिको मृत्यु भएको छ।
यस घटनाको विरोधमा पाकिस्तानको कराँचीस्थित अमेरिकी वाणिज्य दूतावास बाहिर उग्र प्रदर्शन भएको छ। प्रदर्शनकारीहरूले वाणिज्य दूतावासका झ्यालहरू फुटाउनुका साथै ढुङ्गामुढा गरेपछि सुरक्षाकर्मीले स्थिति नियन्त्रणमा लिन अश्रुग्यास र लाठीचार्ज गरेका थिए।
प्रहरी अधिकारी मोहम्मद जावादका अनुसार झडपका क्रममा सुरक्षा फौजले गोली चलाउँदा एक प्रदर्शनकारीको मृत्यु भएको छ भने कैयौँ घाइते भएका छन्। प्रदर्शनकारीहरूले अमेरिका र इजरायलले यस क्षेत्रलाई अस्थिर बनाउन खोजेको आरोप लगाएका छन्।
तेहरानमा भएको आक्रमणमा खामेनीका साथै शीर्ष राजनीतिक सल्लाहकार अली सामखानी र सैन्य कमाण्डर मोहम्मद पाकपोर समेत मारिएका छन् । यसको जवाफमा इरानले मध्यपूर्वमा रहेका अमेरिकी सैन्य आधार शिविरहरूलाई निशाना बनाउने घोषणा गरेको छ। इरानले आफ्ना शीर्ष नेताहरूको हत्याको बदला शसक्त र निर्णायक रूपमा लिने चेतावनी दिएको छ।
विश्वको २० प्रतिशत ऊर्जा आपूर्ति हुने रणनीतिक रूपमा महत्त्वपूर्ण स्ट्रेट अफ हर्मुजलाई इरानी रिभोलुसनरी गार्ड्सले पूर्ण रूपमा बन्द गरिदिएको छ। इरानले अब सो साँघुरो क्षेत्रबाट कुनै पनि जहाजलाई आवतजावत गर्न नदिने सन्देश प्रवाह गरेपछि विश्वव्यापी इन्धन आपूर्तिमा संकट आउने देखिएको छ। खाडी मुलुकहरूले इरानको यो कदमको निन्दा गरेका छन्।
