जेन–जी आन्दोलनका क्रममा डल्लुस्थित घरमा भएको आगलागीमा गम्भीर घाइते भई भारतमा उपचार गरेर फर्किएकी पूर्वप्रधानमन्त्री झलनाथ खनालकी पत्नी प्राध्यापक रविलक्ष्मी चित्रकारको स्वास्थ्य अवस्थाबारे पूर्वराष्ट्रपति, पूर्वप्रधानमन्त्रीसहित विभिन्न दलका नेताहरूले जानकारी लिएका छन् ।
जीवनमरणको अवस्थाबाट गुज्रिएकी चित्रकारको स्वास्थ्य अवस्था स्थिर र सुधारोन्मुख भएपछि भारतबाट स्वदेश आएकी हुन् । बुधबार नेपाली कम्युनिस्ट पार्टीका संयोजक पुष्पकमल दाहाल प्रचण्ड र सहसंयोजक माधवकुमार नेपालले चित्रकारलाई भेटेर स्वास्थ्य अवस्थाबारे जानकारी लिएका छन् ।
पूर्वराष्ट्रपति विद्यादेवी भण्डारी, एमाले नेता प्रदीप ज्ञवाली, नेकपाका नेताहरू वामदेव गौतम, नारायणकाजी श्रेष्ठ, राजेन्द्र श्रेष्ठलगायत नेताहरूले पनि चित्रकारलाई भेटेर स्वास्थ्य लाभको कामना गरेका छन् । यस्तै, नेकपा (संयुक्त)का नेताहरू जीवनराम श्रेष्ठ र दामोदर अर्यालले पनि चित्रकारलाई भेटेर स्वास्थ्य लाभको कामना गरेका छन् ।
