सर्लाहीमा आफ्नै शरीरमा आगो लगाएका एक पुरुषको मृत्यु भएको छ।
मंगलबार आफ्नै शरीरमा आगो लगाएर आत्मदाहको प्रयास गरेका झापा गौरादह नगरपालिका-२ बस्ने ५५ वर्षीय सूर्यप्रसाद पोख्रेलको उपचारको क्रममा गएराति प्रादेशिक अस्पताल जनकपुरमा मृत्यु भएको हो।
पोख्रेलले मंगलबार साँझ लालबन्दी नगरपालिका- ७ डुमडुमे मन्दिर नजिक पेट्रोल छर्केर आफैँलाई आगो लगाएका प्रहरीले जनाएको छ।
सुरुमा उनलाई प्रहरीले उपचारको लागि लालबन्दीस्थित सिटी केयर हस्पिटलमा लगेका थियो। त्यहाँ उपचार सम्भव नभएपछि थप उपचारको लागि राति नै उनलाई प्रादेशिक अस्पताल जनकपुर लगिएको प्रहरीले जनाएको छ।
मृतकका भान्जा कुमार ढकालले उनको सनाखत गरेका हुन्। घटनाका सम्बन्धमा अनुसन्धान जारी रहेको प्रहरीले जनाएको छ।
