काठमाडौँ महानगरका मेयर बालेन शाहले ३ वर्षदेखि रोकिएको उज्यालो महानगर अन्तर्गत हाईमास्ट लाइट जडानले तिब्रता पाइरहेको बताएका छन्। फेसबुकमार्फत जानकारी गराउँदै उनले ६२ मध्य १२ वटा जडान भइसकेको जानकारी दिएका छन्।
‘बिगत ३ बर्ष देखि बिबिध कारणबस रोकिएको हाम्रो पहिलो प्रथामिकतामा रहे मध्येको उज्यालो महानगर योजना अन्तर्गत काठमाडौँ महानगरको लगानीमा करिब १० करोडको लागतमा ६२ वटा हाई मास्ट लाइट जडानको काम तीव्र गतिमा भइरहेको छ,’ शाहले लेखेका छन्, ‘जसअन्तर्गत हालसम्म १२ वटा लाइट प्रज्वलन भइसकेका छन्।’
उनले दसैंअघि नै बाँकी लाइट जोड्ने तयारी भइरहेको समेत उल्लेख गरे। ‘दसैँभन्दा अघि बाँकी सबै लाइट प्रज्वलन गर्ने तयारी भइरहेको छ, अघिल्लो कार्यकालमा राखिएका तर बत्ति नबलेका २ हजार भन्दा बढी सोलार स्ट्रीट लाइटलाई इलेक्ट्रिकलमा बिस्थापित गरि हाल बलिरहेका छन्,’ शाहले लेखेका छन्।
साथै करिब ८५ करोडको स्ट्रीटलाइट खरिद तथा जडानको अन्तिम चरणको तयारी भइरहेको भन्दै उनले लेखेका छन्, ‘जसको सम्पन्नतापछि यसै वर्षभित्र काठमाडौँ महानगर पूर्ण उज्यालो हुने अपेक्षा गरेका छौँ।’
