भारतको राजधानी नयाँ दिल्ली नजिकै एक व्यक्तिले तामझामसहितको ‘नक्कली दूतावास’ सञ्चालन गरिरहेको पत्ता लागेको छ — न देश थियो, न मान्यता, तर शैली भने राजदूतसरह!
४७ वर्षीय हर्षवर्धन जैन नाम गरेका व्यक्तिले एक महँगो भाडाको घरबाट “दूतावास” चलाउँदै थिए। उनी आफूलाई सेबोर्गा वा वेस्टार्कटिका जस्ता ‘माइक्रोनेशन’ (काल्पनिक राष्ट्र) का राजदूत वा सलाहकारको रूपमा चिनाउँथे। यिनले वास्तविक राष्ट्रभन्दा झन् रोचक नाम भएका, तर कसैले पनि आधिकारिक मान्यता नदिएका देशहरूबाट कूटनीतिक पहुँच भएको भनी प्रचार गर्दै ठगी गर्दै आएका थिए।
उनी विदेशी रोजगार वा ठेक्का दिलाइदिने आश्वासन दिँदै पैसा उठाउँथे। विशेष कार्यबलका अनुसार, यो ठगी योजनाबाट उनले ठूलो मात्रामा पैसा संकलन गरेका थिए।
प्रहरीको छापामा झन्डै ४५ लाख भारु नगद, विदेशी मुद्रा, नक्कली पासपोर्ट, भारतको परराष्ट्र मन्त्रालय र अन्य राष्ट्रका बनावटी छापहरू, तथा विश्व नेताहरूसँगका नक्कली तस्वीरहरू बरामद गरिएको छ। साथै, उनको घरबाहिर कूटनीतिक नम्बर प्लेट भएको विलासी कारहरू समेत फेला परेका छन् — यथार्थभन्दा चलचित्रको दृश्यजस्तो।
उनीमाथि ठगी, नक्कली कागजात निर्माण, पहिचान चोरी र अवैध सम्पत्ति प्रबाह (मनी लन्डरिङ) जस्ता गम्भीर अभियोग लागेका छन्। रिपोर्ट अनुसार, जैन एक धनी औद्योगिक परिवारमा जन्मिएका थिए र भारत तथा लन्डनमा व्यवसाय प्रशासनको अध्ययन गरेका थिए।
रमाइलो कुरा के छ भने, सन् २०११ मा पनि उनी अबैध स्याटेलाइट फोन राखेको आरोपमा पक्राउ परेका थिए, जुन अहिलेको अनुसन्धानमा फेरि देखा परेको हो।
