काठमाडौँ । स्रोत नखुलेको १ करोड ४४ लाख रुपैयाँसहित एक चिनियाँ नागरिक काठमाडौँको बौद्धबाट पक्राउ परेका छन्। पक्राउ पर्नेमा ४० वर्षीय वाङ जियान रहेको जिल्ला प्रहरी परिसर काठमाडौँले जनाएको छ।
प्रहरीका अनुसार वाङ जियान काठमाडौँ महानगरपालिका–६ बौद्धको नयाँबस्तीस्थित एक कोठामा डेरा लिएर बस्दै आएका थिए। सोमबार साँझ गोप्य सूचनाका आधारमा जिल्ला प्रहरी परिसर र प्रहरी वृत्त बौद्धको संयुक्त टोलीले सो कोठामा छापा मार्दा रकम फेला परेको हो।
प्रहरी परिसर काठमाडौँका प्रवक्ता एसपी अपिलराज बोहराका अनुसार वाङको कोठाबाट उक्त रकम फेला पारिए पनि उनले त्यसको स्रोत खुलाउन सकेका छैनन्।
“बरामद रकम कहाँबाट आएको भन्ने स्पष्ट गर्न सकेका छैनन्,” एसपी बोहराले बताए, “हामीले अनुसन्धान जारी राखेका छौं।”
उनको साथबाट ईजी २२१६७१ नम्बरको चिनियाँ राहदानी पनि बरामद गरिएको छ। प्रारम्भिक अनुमानमा यो रकम हुण्डी कारोबारसँग सम्बन्धित हुन सक्ने देखिएको छ।
प्रहरीले वाङ जियानमाथि थप अनुसन्धान अघि बढाएको छ। रकमको स्रोत, प्रयोजन र अन्य संलग्नता पहिचान गर्न उनले प्रयोग गरेका डिजिटल माध्यम, कागजात तथा सम्पर्क सञ्जालबारे समेत अध्ययन भइरहेको प्रहरीले जनाएको छ ।
