ऋण चुक्ता गर्न नसकेपछि धनुषा सिमेन्ट उद्योग लिलामीमा गएको छ। व्यवसायीद्वय श्याम सुन्दर अग्रवाल र प्रमोदराज अग्रवालले सञ्चालन गर्दै आएको धनुषा सिमेन्ट उद्योगले कुमारी बैंकबाट लिएको ऋण चुक्ता गर्न नसकेपछि लिलामीमा गएको हो। कुमारी बैंकले सञ्चालकद्वय सँगै जमानीकर्ताको तीन पुस्ते विवरण सार्वजनिक गर्दै ऋण चुक्ता गर्न बोलएको थियो।
माघ ७ गते बैंकले ३५ दिने सूचना जारी गर्दै ऋण तिर्न भने पनि चुक्ता गर्न नआएपछि बैंकले कम्पनीको नाममा रहेको सम्पत्ति लिलामीमा राखेको हो।
उद्योगले उक्त समयमा ऋण चुक्ता गर्न नआएपछि बैंकले पुन दोस्रो पटक सूचना निकाल्दै उद्योगको नाममा रहेको सम्पूर्ण जग्गा एकैपटक लिलामीमा चढाएको छ।
बैंकले असार १५ गतेसम्म लिलामीमा खरिद गर्न भनेको थियो। उद्योग विभागमा २०७५ सालमा दर्ता भई सञ्चालनमा आएको धनुषा सिमेन्ट इन्ड्रस्टिज प्रालिको स्वामित्वमा रहेका सम्पत्ति लिलाम गरेर बैंकले ऋण असुली गर्न लागेको हो।
