दक्षिण कोरियामाथिको जितसँगै मोरक्कोको अन्तिम १६ मा पुग्ने सम्भावना कायमै

काठमाडौँ- फिफा महिला विश्वकप फुटबलअन्तर्गत मोरक्कोले अन्तिम १६ को सम्भावना कायमै राखेको छ ।

समूह ‘एच’ अन्तर्गत अस्ट्रेलियाको हिन्दमार्स स्टेडियममा आज भएको खेलमा दक्षिण कोरियालाई १-० गोलअन्तरले पराजित गर्दै मोरक्कोले प्रि-क्वार्टरफाइनलको सम्भावना कायमै राखेको हो ।

पहिलो खेलमा जर्मनीसँग ६-० को पराजय भोगेको मोरक्कोले दुई खेलमा ३ अंक जोडेको छ ।

यता दक्षिण कोरियाले भने कोलम्बियाविरुद्ध २-० को पराजय भोगेको थियो । मोरक्कोसँग पराजित भएपछि दक्षिण कोरियाको अन्तिम १६ को सम्भावना न्यून बनेको छ ।

आजको खेलमा मोरक्कोको जितमा इब्टिसाम जराइदीले छैटौं मिनेटमा गरेको गोल नै पर्याप्त रह्यो ।

जराइदी मोरक्कोका लागि महिला विश्वकपमा गोल गर्ने पहिलो खेलाडी बनेकी छन् ।